Согласно со Одлуката бр. 02-15/IX-1/2006 од 28.09.2006 година, Народната банка на Република Македонија објавува

Конкурс за годишната награда за млади истражувачи за најдобар труд од областа на макроекономијата

Со цел стимулирање на развојот на научната мисла и изработка на трудови од областа на макроекономијата, како и афирмација на млади и стручни кадри, Народната банка на Република Македонија (НБРМ) доделува годишна награда за млади истражувачи за најдобар труд од областа на макроекономијата.

Годишната награда на НБРМ изнесува 100.000 денари.

Право за учество на конкурсот имаат државјани на Република Македонија до триесет и петгодишна возраст. Вработените во НБРМ и членовите на Советот на НБРМ немаат право на учество на конкурсот.

Трудовите се поднесуваат на македонски јазик. Tрудот треба задолжително да содржи и осврт кон македонската економија на соодветната тема. Трудот не смее да надминува 15.000 зборови (без апстракт, библиографија и анекси) и препорачливо е да има стандардна структура на научно истражување, кое ги содржи следните основни делови:
- апстракт;
- осврт на консултираната литература од областа која се истражува;
- опис на методите на истражување кои се користат во трудот;
- анализа;
- заклучни согледувања и
- библиографија. 

Еден автор има право да поднесе само еден труд.

На конкурсот за избор на најдобар труд авторите имаат право да конкурираат и со трудови кои веќе биле објавени, но не пред 01.01.2008 година. При поднесувањето на трудот, авторот треба да наведе кога и каде бил објавен трудот.

Трудовите се поднесуваат до НБРМ со назнака: „За годишна награда на НБРМ“ по електронски пат, на адреса: konkurs@nbrm.gov.mk или преку линкот "Годишна награда на НБРМ" поставен на интернет-страницата на НБРМ (за НБРМ). Покрај трудот, авторот треба да достави и биографски податоци. Доставените трудови ќе имаат третман на материјали со доверлив карактер.

Изборот на најдобар труд го врши Одбор за евалуација, кој се состои од тројца членови, од кои најмалку еден е надворешен. Претседателот и членовите на Одборот за евалуација ги назначува гувернерот на НБРМ со решение кое ќе се објави на интернет страницата на НБРМ. Согласно Одлуката бр. 02-15/8-2007 од 17.04.2007 година, Одборот за евалуација може да додели втора награда на конкурсот во износ од 50.000 денари.  

Краен рок за доставување на трудовите е 01.03.2010 година.

Годишната награда на НБРМ ќе се додели на 26 април 2010 година, по повод Денот на монетарното осамостојување на Република Македонија.